Matthew 21

Temaraji'i Jerusaremi Vaji Roe Arumajina

(Maka 11:1-11; Ruku 19:28-40; Joni 12:12-19)

1'Enareja pu va'e Jerusaremi rori Petapeje Arivi huri'i 'usevi'i Jesuho Huni tisaiporua no'ohe'i irechamiume va'ara. 2Hu pu ijá 'iama Ja no'o va'e ara ropuna'i va 'usevi'i kave tonikia ka'ene i'ivananave 'u'uiji'i namija ka'avaji aherame Nuni ro'avara. 3'E'eje ea 'ahopo unenu'u pina ja 'warava he'avajaho ijá 'wara'avara Natohwijara ura rejukame nú roe ikaho apeju 'i'i kaivo apejakame pu ja mihuna 'iamana. 4Ijí Hura ijá venajihuni maijaho nitama poropeti vu'a ka'ene 'waramajara nimaa nimaa re'amarono avanana.

5Ja Saiani oni 'apajiji ijá 'wara'avara. Joni Kinia joni rou. Hu masuani tonikia 'ahi hi'eju'e rou. Hu ijí tonikia 'u'ua ka'ene kúchini 'ahi hi'eju'e rou 'iamana.
6'Ejumakame tisaiporua kajija va'e raka ka'ene Jesura 'waramajaho ijá vejara. 7'Enareja pu va'e tonikijaho ahema roumakame 'u'ua hunijaho ijí hu hu'úmo roana. 'Ejume pu ijí huni 'ahi ateha risaremahume Jesuho ajima ijihuni 'ahi hinana. 8'E'eme ea mapoka puni atehi jahena Huni una'i 'unama toi risarema apena va'ume 'ee ea 'aho'a icha anumi 'uhue 'eke 'unama toi Hura ijihuni 'ahi va'amaroreja risarevara. 9'Eji'i ea mapoka ka'ene Huni una'i va'e 'ee túna'i va'ajipo ira ajira mwasirivi'i ijá 'umeja

Teviti oni Hariha ta'aroha Natohwi jihuni iha 'ahi ea ka'ene roujaho merajaho. Hu ta'arohe Huni iha 'unama apene ichu toi ahasiriha 'umejara.
10'E'eme Jesuho va'e ijí Jerusaremi va'uma kamareja ea mapoka kajipo oja hwa'usunaha'eme ijá 'wava Ikaho ea irarane 'wavara. 11'Ejumakame eaka mapoka kajipo ijá 'wava Eakaho Jesu ka'ene poropetia Nasareti Karari vaji rena roana 'wavara.

Jesura Temiporua Vaji Va'e Amairiajina

(Maka 11:15-19; Ruku 19:45-48; Joni 2:13-22)

12'E'eme Jesura va'e ijí Temiporu kajino arumarena ea ka'ene ijí arume 'imearavajaho arukunie 'ee 'ararihie 'ee pura 'aijua ka'ene hine monia senisu vene 'ee hine uka 'imearava kajaho 'unirame 'eka arohume 'useusahara. 13'Ejumakivi'i Hu pu ijá 'iama Godoni ira heha 'ahi ika'ina 'warumana. Nuni seijaho nikwinu siporuaru 'ohuni sea 'wavura kaivo jara iviamajai apena veju'e nesa apejuri sea renu 'iamana. 14'E'ejume ea ka'ene nia supavi'ina 'ee ea ka'ene irima'inijipo ijí Temiporu vaja kajino Huni roumakame Hura vejume maraniana. 15'Ejumakame pirisitia mama'inijija Sikuraipia ijí Hura uneka mamai ka'ene venaji ki'eme sesamai ka'ene ijí Temiporua vaja kajino hijajipo mwasirivi'i ijá 'umeja Teviti oni Hariha ta'aroha 'umejara. 'Ejume pu niho'o ajinavara. 16'Ejumakame pu Jesu ijá 'wava 'Ú ijí pura ira ka'ene 'waravu kajaho A niheno? 'wavara. 'Ejume Jesura ijá 'iama 'I'a ija'ina'omo ja vina nitama Godoni ira vaji ika'ina 'warumajaho kasima 'ee musia ijihipu irijaho ja raka kame pura Natohwiji ta'arohunijaho ja pataha kavara raka? 'iamana. 17'E'ikaivo Hu pu irechami'i kaivo ara kajaho areme Petani va'e hinana.

Jesura Mataka Sirimajina

(Maka 11:12-14, 20-24)

18'Ena'omo ijihuni sú'uhijino Hu vukú'o 'unama ari natohwi va'eme 'unamutoi matumana. 19'E'eme roi kavume matakijaho 'unamu rori namijuma kamarena maa rena namu ro'i kaivo vai'i kamajaho 'ina pa'ana kamarena ijá 'wama A niho'o vukú'uha maa pare'ena 'wavume ni'aha kwino saranana. 20'Ejumakame Huni tisaiporuepo ijí mataka kaji ka'eme sarajumakame oja hwa'usunaha'eme aposarama ijá 'wava Ichá vene ike matakakaho iviamaa Huni iri 'ahi sarano? 'wavara. 21'Ejume Jesura ijá 'iama Na nimaa nimaa'e ja 'waravu Ja 'unama nikwinu nimaa ro'avajaho ja areri ike iviamaa matakake renaja'ineru pavehuna kaivo jara huri'ake ika'ina 'warave hu tajaheuna 'urina va'e sohi 'ona 'wave ijá rehuna. 22'Ene ja niho'o nimaa nimai ro'i kaivo unenu'u 'aho'a Godi jari'avajaho ja 'ekahuna 'iamana.

Jesuni Haruriji Rona Apovajina

(Maka 11:27-33; Ruku 20:1-8)

23Hu va'e Temiporu vaji hine ea naja'eme pirisiti mama'ina 'ee Jua puni emakinepo roe Jesu apoma ijá 'wava A harura irakijara reju'e uneunechakija veno? 'Ú ea irara harurakaho mahu'e avano? 'wavara. 24'Ejume Jesura ijá 'iama Na 'u'o ja aporave ja ijihuni maa 'wari'avaji'a Na 'u'o harura ka'ene raki reju'e Na vejujaho 'warahuna. 25'Ú Joni Papitisita kahi akúpi 'ahi rena roana ho ema puni rena roane? 'iamana. 'Ejumakame pu hine 'wama apene puni vaja kaji 'oji'i ijá 'wava Nú akúpi 'ahi rena roana 'wa'avajaho Hu ijá 'úhune ja rakijihuna'e ijí Jonira raka ka'ene 'waramajaho panimai rojo? 'ú'ena. 26'Ene nú emaapuni rena roana 'wa'avajaho nú eaka mapokijihi juhavu. Ijihuni maijaho eaka mapokijipo hena kavajaho hu poropetia vwihajara 'wavara. 27'Enareja pu Jesu ijá 'wava Nú puruva renu 'wavara. 'Ejume Jesura ijá 'iama 'Ena'omo Na harura iraki apene uneunechakaho vejujaho pa'warahuna.

Hariha No'ohe'i Puni Haijina

28'Ú ja ichá vwihajo? Ea pina huni harihija no'ohe'ina'omo hu pokijihuni va'e ijá 'wama Harihavuro! A iviasa va'e ajina juari kaukara ve'amana 'wamana. 29'Ejume Hu ijá 'wama Na vahuna 'wamana kaivo hu pava'ana. 30'Ejume hu vukú'o va'e 'u'uijihuni va'e vu'aka nikwinu'ina kajaho 'waramana. 'Ejume Hu ijá 'wama Na pavahuna 'wa'i kaivo hu iji'a areme túna'i va'ana. 31'Enakaivo ea iraka sa'inijara omahoni ira hene venane? 'iamana. 'Ejume pu ijá 'wava 'U'uijarana 'wavara. 'Ejume Jesura ijá 'iama Na nimaa nimaa ja 'waravu. Ea ka'ene takisia apeji'ina 'ee ea ka'ene 'uasa veji'inijipo asitahe urasahe Godoni ara vahuna. 32Joni roe 'unama ka'ene arimaiji ja najahana kaivo ja panimai ro'eme ea ka'ene takisia apeji'ina 'ee ea ka'ene 'uasa veji'inijipo nimaa rojara. 'Enakaivo ja túna'i ijaho kavara vo ja joni oja pataarohe panimai rojara 'iamana.

Aja'ina Juara 'Ajohi'inijihi Puni Haa

(Maka 12:1-12; Ruku 20:9-19)

33'E'ikaivo vukú'o Jesura ijá 'iama haa pinake heha. Ea pina mwe'a anesura ajina juara mene ajina 'one ijikano uja pimena raname 'ee vera iramapi tauhuhe 'ee 'wainia tautahuni ruha 'ume amairie 'ee ijí juasi'a kajino namine aiha vehuni tinia vene ijí juara kajaho ea ka'ene moni juara veji'ini jihipuni ija tahi rana'i kaivo hu kwaa jopatu'uri va'ana. 34'Ena'omo vea ka'ene ajina marasahuni vea niturajumakavi'i hu huni pwehija irechamiume ijí ea ka'ene juasi'a 'ajohu kajihipuni ajina 'eka'i va'ara. 35'Ejumakame ea ka'ene juara kaji 'ajohujipo pwea pina hijahe pina 'anaume kwavume pina muni one hijahume kwamana. 36'Ejume hu kú'o pwehwaha 'aho'a 'u'o irechamiume va'ume vukú'o marako ahia kaja'ina'e 'aniume kwamasahara. 37'Ejumakama'e iji'a túna'i hu huni hariha pina ranavume va'eme hu ijá rona Pu nuni hariha kehuni hura ve'eja ronana. 38'Ejumakame ea ka'ene ijí juara kaji 'ajohajipo hariha kaji kamareja pu kosarama ika 'wava Eakara roareje omahoni uneunecha mapoka 'eka'enakúne roe 'anaa kwamama. 'Ejakame huni aachikaho núna renama 'wavara. 39'Enareja pu hu apene pi'onavume samai va'umakavi'i 'anauma kwamana. 40'Ena'omo ijí juara anesura kajara ro'amajaho ea ka'ene juara kaji 'ajohujija ichá 'ahihune? 'iamana. 41Pu Hu ijá 'wava Hu pu niho'o eha sisea ni'ima'ura mihe 'anie tirahakivi'i vu juara kajaho ea 'aho'a'e mihe 'ajohe hi'ira'omo vea ka'ene ahaja ihuni veijara roakavi'i pura 'iruma eiria vajahuna 'wavara. 42Vukú'o Jesura pu ijá 'iama 'Ú ja nitama Godoni ira vaji 'waramajaho pataha kavure? Hu ika'ina 'waramana.

Ijí muna ka'ene ara veji'inapo pi'onava kajara iviamaikaho ara kajihuni kúrúti tukeja natohwa'e rena naminu. 'Enajihuna'e Natohwijara uneunecha ka'ene mamaijija veju'e roe samaahiravu'e nú kivo? 'iamana.
43Ijihuna'e Na nimai ja 'waravu. Godira Huni ara ka'ene ikino joni vaji namujaho apene ea 'aho'a mihe pu hami 'ajohakame 'ina rehuna. 44'E'eje ei pini 'one muna 'aha kajino nina'amajaho hu niho'o pu'usahe ma'u'umai rehuna kaivo muna kajara 'one emai 'ahi nina'amajaho ea kajaho niho'o pu'usahe túa rehuna 'iamana. 45'Ejumakame pirisitia mama'inijija 'ee Parasia Jesuni haa kaji hejajaho pua rona 'waravuma hejara. 46'Enareja pu 'unama same Jesu 'ana'i 'ahiara kaivo ea mapoka kajipo vwihajujaho Hu poropetia rojujihuna'e jumareja makavara.